Алакан жай, дуба кыл, сура…
Сурай турган нерселер огеле көп…
Пайгамбарды канчалык сүйөсүӊ?
“Оӊ тарабымды карасам да, сол тарабымды карасам да Насибанын жан үрөп салгылашып жатканын көрдүм”.
Бул “Ухуд” согушунан кийинки пайгамбарыбыздын (ага Алланын тынчтыгы жана мактоосу болсун) айткан сөзү.
Насиба бинт Каьб – Каьбдын кызы Насиба, күйөөсү жана баласы менен бирге “Ухуд” согушуна катышкан баатыр аял. Согушка жөн эле катышпай, эркектердин көбү артын карабай качып, душмандын чок ортосунда пайгамбарыбыз (ага Алланын тынчтыгы жана мактоосу болсун) бирин-серин сахабалары менен калганда, көкүрөгүн өлүмгө тосуп, пайгамбарыбызды (ага Алланын тынчтыгы жана мактоосу болсун) коргогон аял.
Ошол согуштагы бир ирмемди Насиба минтип кеп салат:
“Аскерлер туш тарапка тозуп качып, Алланын элчиси (ага Алланын тынчтыгы жана мактоосу болсун) душмандын ортосунда жалгыз калыптыр. Ибн Камия деген эме “Кана, мага Мухаммадды көрсөткүлө, же мен же ал…!” деп кылычын жалаӊдатып оолугуп чыкты. Мен анын алдына чуркап чыктым. Бир жактан Умайрдын уулу Мусаьб да жетип келди. Экөөбүз тигини Аллахтын элчисине жеткирбей ара жолдо тосуп калдык. Тиги мени дал желкеме уруп калды. Ооруну сезбедим. Мен да кылычым менен көкүрөккө чаптым, бирок, жаныӊ жегирдин эки кабат темир чопкуту аны өлүмдөн сактап калды”.
Кийин пайгамбарыбыз (ага Алланын тынчтыгы жана мактоосу болсун) аларга: “Аллахым бул үй-бүлөгө береке бергин” – деп дуба кылганда, Насиба: “Оо, Алланын элчиси, сени менен бейиште кошуна болууну дуба кылчы”, – деп суранды. Пайгамбарыбыз (ага Алланын тынчтыгы жана мактосу болсун) ушинтип дуба кылды.
Насиба айтат: “Алланын элчиси ушинтип дуба кылгандан кийин, башыма кандай балээ-балекет түшпөсүн, аны такыр сезчү эмесмин”.
Чындап эле “Ямама” казатында он эки жеринен жаракат алып, кыймылга жарабай калган колун кесип салышканда да Насиба ооруну түк сезген эмес экен.
Менин сүйүктүү эжем, сүйүктүү карындашым!
Сен пайгамбарды канчалык сүйөсүӊ?
“Оо, Алланын элчиси, мен сен үчүн мына мындай иштерди кылып жатам, акыретте сени менен кошуна болуума дуба кылчы”, – деп, кайсы ишиӊди Алланын элчисине көрсөтө аласыӊ…?!