АДАМДЫ АДАШТЫРУУДА ШАЙТАНДЫН ЫКМАЛАРЫ
Шайтан адам баласына келип: “Бул акырет ишиңди ташта, дүйнөдө, акыретте да бактысыз болуу үчүн бул жаман ишти кыл”, – деп айтпайт. Анткени, андай кылса, ага эч ким моюн сунбай коёт. Бирок ал пенделерди азгыруу үчүн көптөгөн жолдорго барат.
1. Жалганды кооз кылып көрсөтөт
Жалганды кооз кылып көрсөтүү пенделерди адаштырууда шайтандын негизги жолу. Акты кара, караны ак, жалганды акыйкат, акыйкатты жалган кылып көрсөтөт. Адам баласына жалганды кооздой берип, акыйкатты жаман көрсөтүп, жадагалса, чындыктан жүз үйрүтүп, бузуку ишке түртө баштайт, наалаттанган шайтан Улуу Аллага айткандай: “Иблис айтты: “Оо, Роббим! Мени адаштырганың үчүн мен аларга жердеги күнөө нерселерди кооз көргөзүп, ыкластуу пенделериңден башкасын бардыгын азгырамын!”
Ибн Кайим: “Шайтандын айла-амалдарынын бири – адамды азгыруу үчүн акылды сыйкырлап коёт, анын сыйкырынан Алла сактаган пенде гана кутула алат. Адамга зыяндуу нерсени кооз кылып көрсөтүп, жадагалса, аны эң пайдалуу кылып көрсөтүп, пайдалуу нерседен алыстатып, жадагалса, аны эң зыяндуу кылып көрсөтүп коёт. Бул сыйкыр менен канчалаган пенделер сыноого дуушар болушкан! Ушул сыноо менен канча жүрөк ислам, ыймандан тосулуп калды. Канчалаган жалгандар кооз сулуу болуп көрсөтүлдү, ал эми акыйкат чындыкты жаман сүрөттөп көрсөттү! Канчалаган жасалма нерселер сынчыларга кооз кылып көрсөтүлдү, канчалаган жалган нерселер илимдүүлөргө сунушталды!”
Шайтан акылдарды сыйкырлап, адамдарды түрдүү көңүл кумарларга түрттү. Аларды адашкан ар кандай жолдорго азгырып, буттарга сыйынууну, тууган-уруктан карым-катнашты үзүүнү, тирүүлөй кыздарды көмүүнү, өз энесине нике кыйып алууну кооз кылып көрсөтүп, аларды кыйроодон кийин кыйроого түртүп, анан бейишке киресиңер деп убада кылды. Ошондой эле Алланын сыпаттарына каапыр болушса да, силер Алланы аруулап жатасыңар деп көрсөттү, адамдарга жагынуу үчүн, алар менен жакшы адепте бол деп, жакшылыкка чакырып, жамандыктан тыюуну таштатты да, “Өзүңөргө өзүңөр жооп бересиңер” деген аятка амал кылгыла деди. Силерден да билимдүүлөр бар деп, көр ээрчүүнүн негизинде пайгамбар (ага Алланын ырайымы жана тынчтыгы болсун) айткан сөздөн баш тарттырат.
Наалатка калган Иблис ушундай жол менен Адам атаны да алдады: Алла Таала арам кылган даракты кооз кылып көрсөтүп “бул түбөлүк калуучу дарак, ким андан жесе, түбөлүк бейиште калат же периштеге айланып калат” деп азгыра берип Адам ата ага баш ийип, анан бейиштен чыгып кетти. Бүгүнкү күндө шайтандын достору бул жоруктарды адамдарды адаштырууда кандай колдонуп жатканын кара.
Коммунизм жана социализмге чакыргандарды карабайсыңбы?! Алар ушул жолдор гана адам баласын ачкалыктан, кайгы-кападан, жок болуп кетүүдөн куткарып калат деп ойлошот…..
Аялзатын жарым жыңалач болуп, көчөгө чыгууга үндөгөн “демократия” деген чакырыктарды кара, маданияттын атын жамынып, адам баласынын аброюн төгүп, бузукулукка, адепсиздикке чакыргандар бар.
“Көп пайда табуу үчүн акчаңды сүткор банктарга кой” деген ууланган ой-пикирлерге үндөгөн чакырыктар бар. Динди кармангандарды караңгылык, артта калган дегендер, исламга үндөгөн аалымдарды жинди, акмак, “Чыгыштын камчысын чаап жатат” деген чакырыктар да бар.
Булардын баары шайтандын жолдору, мындай жол менен бир нече кылым мурун Адам атаны алдаган эле. Ушинтип шайтан жалганды кооздоп, акыйкатты жаман сүрөттөп, элге аны жийиркеничтүү кылып көрсөтөт. “Аллага ант, оо, Мухаммад, Биз сенден мурунку үммөттөргө да пайгамбар жибергенбиз. Бирок, кийин шайтан аларга ширк иштерин кооз көргөзүп, ошол күндөгү дүйнөдөгү башчылары болуп алган. Аларга кыйноочу азап бар”.
Бул өтө коркунучтуу жол, анткени адам баласына жалган кооз көрсөтүлсө, ага жетип, орундатуу үчүн аракеттенип, жада калса, ал өзүнүн зыяны үчүн болсо да, күчүнүн баарын жумшайт. “Айт: (о, Мухаммад): «Иштеринде зыян тарткандар жөнүндө силерге кабар берейинби? Алар бул дүйнө жашоосунда аракет-жолдору адашкан, бирок «биз эң мыкты иш жасап жатабыз» деп ойлогон адамдар”.
Алар адамдарды Алланын дининен тосуп, Кудайга жакын болгон адамдар менен согушууга умтулушат да, биз туура жолдобуз, акыйкат биз тарапта деп ойлошот. «Шайтандар аларды Туура Жолдон тосушат жана алар өздөрүн Туура Жолдо деп ойлоп жүрө беришет».
Ушул себептен улам, каапырлар акыреттен баш тартып, дүнүйөнү алдын коюшту. Алла Таала: “Биз аларга Куранды четке каккандан кийин жин-шайтандардан «досторду» даярдап койгон элек. Анан шайтандар буларга алды-артындагы күнөөлөрдү кооздоп көргөзгөн. Натыйжада өздөрүнөн мурда өткөн каапыр инсандар жана жиндердин катарында алардын башына да сөз (азап) келүүсү акыйкат болуп калды. Чынында, алар зыян тартуучу болушту”, – деп айткан.
Жин-шайтандар аларга дүйнө иштерин кооз көрсөттү, ал адамдар, жадагалса, дүйнөнү бардык нерседен жогору коюп калышты, анан шайтан аларды Кыямат күнүн жалганга чыгарууга чакырды да, аларга бул ишти кооз кылып көрсөттү эле, алар эсеп-кысапты, Кыяматты, бейиш жана тозокту чанып жиберишти.