Ыйман Келмеси
Бисмил-Лаахир-рохмаанир-рохиим.
Мээримдүү жана Боорукер Алланын аты менен баштаймын.
Аллага мактоо айтабыз, Андан жардам сурайбыз жана кылган күнөөлөрүбүз үчүн кечирим тилейбиз.
Кимде-ким Жалгыз Аллага таянып, Ага тобокел кылса, Алла аны ызаттуу кылат. Кимде-ким Алладан башкага таянса, Алла аны таянганы менен бирге кор кылат.
Кимде-ким Аллага гана сыйынып, Андан жардам сураса, Алла ага ыраазы болот. Кимде-ким Алладан башкага сыйынса, ага Алла ачууланат.
Кимде-ким Алланы жүрөгүнө киргизип, Аны эстесе, ага Алла мээримин төгөт. Кимде-ким Алланы унутуп койсо, ага Алланын азабы болот.
Күбөлүк берем Алла жалгыз, анын эч кандай шериги жок. Ал бүткүл ааламдын падышасы, Ал эч нерсеге муктаж эмес, биз Ага муктажбыз. Ал Алла адамзатка өзүнүн жалгыз экендигин билдирген зат. Ал Алла инсандарды өзүнө ыйман келтирүүгө буйруду. Ал Алла өзүнө ыйман келтиргендерге түбөлүктүү бейишти убада кылды. Ал эми ыйман келтирбегендерге азабы катуу тозокту даярдап койду.
Күбөлүк берем Мухаммад (ага Алланын салам-салаваты болсун) Алланын кулу жана акыркы элчиси. Ал Пайгамбар (ага Алланын салам-салаваты болсун) адамзатты ыймансыздыктын сазынан тартып чыгып, ыймандуулуктун нуру менен нурлантты. Адамзатты бактысыздыктын чуңкурунан бактылуулуктун туу чокусуна алып чыккан улуу пайгамбар Мухаммадка жана анын үй-бүлөсүнө Алланын саламы жана салаваты болсун.
Урматтуу мусулман бир тууганым!
Адам баласына өтө зарыл болгон баалуу нерселер бар. Аларга жетүү үчүн адам баласы бүткүл өмүрүн коротот. Бирок канчалаган мээнет, эмгек менен табылган бул нерселерди калтырып, жалгыз кетүүчү күн келет. Мына ошол бардык нерсени калтырып кетүүчү убакытта, бизге жолдош болуп жаныбыздан бир карыш да алыстабай бирге боло турган эң баалуу нерсе бул – ыйман. Адам баласы төрөлгөндөн өлгөнгө чейин, өлгөндөн, Алланын алдына барып, эсеп берип Бейишке киргенге чейин аны менен бирге болуп, ага бакыттын жолун көрсөтүүчү нерсе бул – ыйман. Ыймандын даамын татып, ыйман нуру менен жашаган адам эки дүйнөдө бактылуу, ал эми андан алыс болуп, ыймансыздыктын караңгылыгында жашаган адам эки дүйнөдө бактысыз болот.
Ыйман бул – тил менен айтып, жүрөк менен ишенүү жана амал менен тастыктоо. Тилибиз менен Лаа илааха ил-Лаллооху Мухаммадур-расуулуллох, Алладан башка сыйынууга татыктуу зат жок, Мухаммад анын элчиси деп күбөлүк беребиз. Айткан келмебизге жүрөгүбүз менен ишенебиз. Алланын, Жалгыз жана шериги жоктугуна, Жараатуучу жана Кудуреттүүлүгүнө, Тирүү жана эч качан өлбөстүгүнө, бардык ааламды башкаруучу жана ибадат кылууга татыктуу Зат экенине ишенген соң, Ага гана ибадат кылабыз. Алла Таала канча пайгамбар жиберген болсо, алардын баары «Лаа илааха ил-Лаллоох» келмесин жеткиришти. Пайгамбарыбыз (ага Алланын салам-салаваты болсун) дагы, алгачкы пайгамбарлык доорунда ыйман үчүн мээнет кылды. Анткени, адамга ыйман кирмейинче, ал ибадат кыла албайт. Ыйман келмеси эң алгачкы милдет жана эң акыркы милдет. Тагыраак айтканда, адам мусулман болуу үчүн ыйман келмесин айтуу керек. Ошондой эле өлүм алдында дагы ыйман келмесин айтуу керек. Пайгамбарыбыз (ага Аллатын салам-салаваты болсун) бир хадисте: “Лаа илааха ил-Лаллооху, бейиштин ачкычы”, – деп айткан. Улуу сахабалардын бири Муаз ибн Жабал (Алла андан ыраазы болсун) бир жолу чогулуп отурган адамдарга мындай деди: “Азыр силерге сүйүнүчтүү кабар айтамын. Мен, Пайгамбарыбыздан (ага Алланын салам-салаваты болсун) бир сөз уккан элем. Бирок силерди ошого таянып албасын деп ушул күнгө чейин айтпай жүрдүм. Эми мага өлүм жакындап калды. Эгер бул сөздү айтпастан өтүп кетсем, күнөөкөр болуп калам. Анткени, билгенин жашырып башкаларга айтпаган адам Кыямат Күнү оттон жасалган жүгөн менен жүгөндөлөт. Пайгамбарыбыз (ага Аллатын салам-салаваты болсун) мага: “Кимдин өлүм алдындагы эң акыркы сөзү «Лаа илааха ил-Лаллоох» болсо, ал бейишке кирет”, – деп айткан.
«Лаа илааха ил-Лаллоох» келмеси менен өткөн адам кайсы бир күнөөлөрү үчүн азапталса да, баары бир бейишке кирет. Пайгамбарыбыз (ага Алланын салам-салаваты болсун): «Кимдин жүрөгүндө кыпындын салмагындай ыйманы болсо, тозоктон чыгарылып бейишке киргизилет», – деген. Диндеги эң такыба адам деген атка конгон Хасан Басри бир досунан кабар алганы үйүнө келет. Досу төшөктө, өтө оор абалда жатат. Хасан Басри:
– Досум, азыр эмнени көрүп турасың – деп сурайт. Анда досу:
– Өтө шашылыш келген өлүмдү көрүп турам, бирок андан кутулууга эч кандай айлам жок. Аябай коркунучтуу мүрзөнү көрүп турам, бирок ал жерде мени менен бирге боло турган жолдошум жок. Жагымдуу, кооздолгон бейишти көрүп турам, бирок ал жерге алып баруучу амалым жок. Жагымсыз, алоолонгон тозокту көрүп турам, бирок андан сактап калуучу жардамчым жок. Илинип коюлган таразаны көрүп турам, бирок ага салмак болуучу соопторум жок. Тартылган кыл көпүрөнү көрүп турам, бирок андан алып өтүүчү жандоочум жок. Кечиримдүү, Боорукер Алланы көрүп турам, бирок Анын алдына алып баруучу эч кандай далилим жок – деп жооп берет.
Досу кайтыш болгондон кийин Хасан Басри түшүндө көрөт да:
– Абалың эмне болду? – деп сурайт. Анда ал:
– Алла мени Өз ырайымы менен Лаа илааха ил-Лаллоох келмесинин урматы үчүн бейишке киргизди деп жооп берет.
Бул келме, бул дүйнөдө ак-таза жашоого, акыретте болсо, бейиште болууга жардам берет. Бул келме жети сөздөн турат. Ким ага амал кылып жашап өтсө, ага тозоктун жети эшиги жабык болот. Бул келме жыйырма төрт тамгадан турат. Ким ага амал кылып жашаса, анын жыйырма төрт саат ичиндеги жасаган кылган күнөөлөрү кечирилет. Ким бул дүйнөдө ыйык келмени жүрөгүнө киргизсе, өлүм алдында аны айтуу жеңил болот.
Мисирде бир ооруканада мындай окуя болот. Ооруканага авто кырсыкка кабылган эки адамды алып келишет. Дарыгер аларды карап, текшергенден кийин, алардын жашап кетүүсүнө көзү жетпей, аларга келме айттырууга аракет кылат. Алардын бирине «Лаа илааха ил-Лаллоох» деп айткан сайын аны кайталоонун ордуна “тамеки бергиле” деп кайра-кайра айтат да, башка бир сөз айта албастан көз жумат. Экинчисине келмени айтканда, ал дарыгерге карап “сен Лаа илааха ил-Лаллоох келмесин туура эмес айтып жатасың, келмени Лаа илааха илла-Лооху деп созуп айтуу керек” деп ага үйрөтүп, анан жан берет. Бул дүйнөдө жүрөк эмнеге толсо, өлүм алдында ошону эстейт.
Аллахым ар бирибизге ыйман келмеси менен өтүүнү насип кыл.
Урматтуу мусулман бир тууганым!
Качан инсан кабырга коюлган кезде, ага эң биринчи берилген суроо дагы «Роббуң ким?» деп, ыйман келмеси тууралуу болот. Ал эми, Кыяматта бейиштин алдына келген кезде, бейиштин эшигине да ушул ыйман келмеси жазылып коюлган. Лаа илааха ил-Лаллоох менен жашайбыз, Лаа илааха ил-Лаллоох менен жан беребиз. Лаа илааха ил-Лаллоох менен кабырга киребиз, Лаа илааха ил-Лаллоох менен Мункар-Накирдин суроосуна жооп беребиз. Лаа илааха ил-Лаллоох менен Махшар майданында тирилебиз, Лаа илааха ил-Лаллоох менен Алланын алдында сурак беребиз. Лаа илааха ил-Лаллоох менен Сирот көпүрөсүнөн өтөбүз, Лаа илааха ил-Лаллоох менен бейишке киребиз. Биздин бактыбыз бир гана ушул келмеде. Башка эч нерседе бактылуулук жок.
Өлүм периштеси эшигибизди кагып келгенге чейин, ыйман келмесин жүрөгүбүзгө киргизели. Өзүбүз ага амал кылып, башкаларды да ага чакыралы. Өзүбүзгө каалаган бейишти, башкаларга да ыраа көрөлү.
Аллахым, ар бирибиздин жүрөгүбүзгө ыйман келмесин жайгаштыргын.
Аллахым, ар бирибизди ушул келме менен жашап, келме менен өтүүнү насип кыл.
Аллахым, баарыбыздын билип жана билбей жасаган күнөөлөрүбөздү кечирип, улуу бейишиңде чогуу кыл.
Ассалааму алайкум ва рахматул-Лохи ва баракатуху!