Адатта ар инсандын жан дүйнөсүнө Жараткан Алла сыйынуу инстингин салган. Кээ бирлери бул муктаждыкты туура жол менен толтурса, кээси өздөрү билбеген абалда туура эмес нерселерге сыйынуу менен толтурушат. Бирок, акыйкат баарына бирдей демекчи, бир гана туура жол бар. Ал – биз тутунган Ислам дини.
Жан дүйнө Ислам динин тутунганга чейин тынч, бакубат абалда болбойт! Анткени, биздин рухубузга дал ушул Ислам дини гана азык болуп бере алат. Башка бир да адамдар ойлоп тапкан КУДАЙЧАЛАР адамдын ички жан дүйнөсүн, руханий абалын тынчтыкка, бейпилдикке толтуруп бере албоосу айдан ачык эмеспи. Жадагалса аффирмация, визуализация, медитация сыяктуу азыркы күндө актуалдуу болгон психологиялык курстар да пайдасыз.
Ооба, туура түшүндүңүз.
Ислам – бизди туура жолго жетелөөчү аруу дин. Анда бардык маселеге чечим да, өкүм да бар. Бирок, аттиң! Ушул улуу динибиз турса, аны чанып, караңгы көрүп, жашообузга тынчтыкты башка жактан издегенибиз болуп жатпайбы!
Жүрөгүңүз акыйкатты таппай, кимисинин карманган дини туура деп тыпырчылап, акыйкат издеп жаткан болсоңуз, анда Жаратканга кайрылып, чын дилиңиз менен Андан туура жол көрсөтүүсүн сураңыз. Чындыгында, дубаларды кабыл кылуучу бир гана Алла!
Ислам динин тутунган мусулман катары баарыңыздарды Ислам динин үстүртөн эмес, терең түбүн казып, акыйкатын издөөгө чакырам. Себеби издеген адам сөзсүз акыйкатты табат. Ал эми акыйкат карманган Ислам динибизде. Дал ушул аруу, таза динде туура ибадат кылуудан баштап, адамдарга сыпайы мамиле кылуу зарылдыгы, жадагалса жаныбарлардын акыларына чейин кеңири айтылган!
Мына, керемет дин! Оо Аллахым! Мени Пайгамбарыбыздын, ага Алланын ырайымы жана тынчтыгы болсун, үммөтү кылып жаратканыңа ЫРААЗЫМЫН. Дуаларымды кабыл кыла көр!
Макаланы жазган: Айтикул кызы Апал