Ислам динибизде дуа кылуу менен Жараткан Алладан каалаган муктаждыгыңды чечип алсаң болот. Бирок “эмне себептен көпчүлүгүбүздүн дуаларыбыз кабыл болбойт?” деп айтууңуз мүмкүн. Улуу Жараткан сураганыбызды дайыма берүүгө даяр, болгону биз Андан кем-карчыбызды СУРАГАНЫ даяр эмес болуп жатпайбызбы!
Эгерде бизде Жараткан сөзсүз дуамды кабыл кылат деген бекем ишеним болгондо, сураганыбыз тез аранын ичинде эле орундалып калмак. Мисалы, колунда мал-байлыгы бар таанышың сага акча берээрине ишенесиң да, бирок Жараткандын кенен казынасы бар, чын дилден мыкты амал тартуулап кийин муктаждыгыбызды сурасак берээрине күмөн санайсың.
Демек, биздин биринчи аракетибиз Алла сөзсүз берет деген ишенимди жүрөккө алып келүү.
Алла Мээримдүү Зат ден-соолук сурасаңыз аны берет. Тилекке каршы врачтардын бир сөзүнө кирип “айыкпас рак оорусуна туш болдуң“ деп айткан сөзүнө Жаратканга эмес пендеге ишенип, дароо үмүтүбүздү үзүп коебуз.
Жараткандан үмүт кылууну токтотпонуз!
Демек, дуа – бул казынанын ачкычы. Ал казынада байлык да, мансап да, ден-соолук, айтор баары бар. Болгону пендеден ишеним жана аракет талап кылынат.
Андыктан, күнүгө дуа кылууну адат кылыңыз. Жакын тууган-урук, ата-энеңизден тартып, бүткүл үммөткө жакшы дуаларыбызды арнайлы.
Аллахым баарыбыздын дуаларыбызды кабыл кылсын!
Макаланы жазган: Айтикул кызы Апал