Оо менин Жаратканымдан мага аманат болуп келген белектерим. Жакыным, жаркылдагым, кызым жана салабаттуу, ыйбалуу балам. Силерди Аллахым бергенде атаң экөөбүз ушунчалык кубанганбыз жана келечекке чоң максаттарды койгонбуз. Жаратканымдан дайым силердин ыйманыңардын курч болуусун, солиха, такыба болууңарды сурап келем. Жаратканым кабыл кылсын. Оомин.
Кызым сага айтаарым, намыстуу, уяттуу бол. Дал ошондо ыйманыңды дагы да кооздогон болосуң. Жоолугуңа бекем бол. Хижаб сени ар кандай жамандыктан алдын алган калкан сыяктуу. Ал эми бул жашоо өтө кыска жана азгырыкка толгон. Жаратканыңа таян, адамдардан күтпө! Куралың намаз жана дуба болсун. Бактылуулукту дайым динден изде.
Кызым, жарыгым менин, насип кылып, Куранды толук жаттап, ага амал кылган хафизалардан бол. Атаң экөөбүзгө кылган эң чоң белегиң жаттаган Кураның болсун. Жараткан өмүрүңө береке берсин. Сүйүктүүм, Алла үчүн жакшы көргөн бактылуу кызым, айтылган насааттар дайым жүрөгүңдө болсун.
Оо даанышман балакайым, а сен канча жашка чыксаң да, мен үчүн дайым бала бойдон каласың. Жаратканым сени такыба, тайманбаган эр жүрөк кылсын. Улуу сахабалар сыяктуу динине бекем салабаттуу кылсын. Дайым диниңдин, эли жериндин камында боло көр. Сен дайым дубамдасың каралдым. Аллахым силерге жаркын келечек тартууласын. Жаратканыма аманатсыңар!
Макаланы жазган: Айтикул кызы Апал