Алла Таала инсанга сыноо үчүн көптөгөн сезимдерди берген, мисалы: коркуу, кубануу, кайгыруу жана дагы башка көптөгөн сезимдер. Биз бул сезимдерди аңдап, Жаратканга жаккан чечимдерди чыгаруубуз зарыл. Пайгамбарыбыздын, ага Алланын ырайымы жана саламы болсун, хадисинде айтылгандай “Араңардан кимдир бирөө күнөө ишти көрсө, колу менен тыйсын, ага алы жетпесе, тили менен тыйсын, ага да алы жетпесе, жүрөгү менен жаман көрсүн” .
Демек, акыйкат жоголуп жаткан убакта унчукпай коркуп олтура берүү – ал күнөөгө шериктеш экендигин айгинелейт. Ушакты угуп туруп, аны тоспогонубуз, күнөөлөрдү көрүп, унчукпаганыбыз, жадакалса алардын акыйкатты түшүнүүсү үчүн дуба кылбаганыбыз, Пайгамбарыбыздын (с.а.в) хадисине амал кылбаганыбыз эмеспи. Анан кантип мен Мухаммад пайгамбардын (с.а.в) үммөтүмүн деп төш каккылайбыз?
Дин баарыбызга АМАНАТ болуп берилген, ошол үчүн да акыйкатты тайманбай кооздук жана жөнөкөйлүк менен жеткирүү сизге да, бизге да милдет. Инсандан эмес Жаратуучубуздан коркуучулардан бололу. Эгер инсандардан коркуп, акыйкатка көздү жума турган болсок, анда Алла бизди дал ошол инсандарга тыштап коеру, пендесине нааразы абалда назарын салса, пенде үчүн мындан өткөн жаман нерсе болбос. Акыйкатты коркпой айтуу үчүн бекем ЫЙМАН керек.
Инсандардан корксоңуз, анда билиңиз, ыйманыңыз дале алсыз, ал жадакалса сизди күнөөдөн тосо албай жатат. Ыйманыңызга мээнет кылып, акыйкатты таанууңуз керек. Инсандын жүрөгүндө эки коркуу бир болбойт. Инсандан корксоңуз, демек Алладан коркуу ЖОК, Алладан корксоңуз инсандан коркуу жок болот.
Ар ким өзү ой жүгүртсүн: жүрөгүндө кимге болгон коркуу бар. Балким эл эмне деп жоолук салына албай, намаз окубай жүргөн болсоңуз, анда Алладан коркуу жок. Андыктан, бул акыл-насааттарды окуп, ар бирибиз туура чечим чыгараарбыз деген ишенимдемин.
