Дуалар

Ыйык Курани Каримде 25 пайгамбардын аты жазылган. Кээ бир сүрөлөр дагы алардын ысымы менен аталган. Пайгамбарлар Алла Таала тандап алган инсандар. Алар эң бийик адеп-ахлактын ээси, башкаларга үлгү боло турган адамдар. Куранда 13 пайгамбардын дуасы бар.

Пайгамбарыбыздын с.а.в. хадисинде: “Ар бир пайгамбардын Аллага кайрылган дуасы болгон. Дуа аркылуу алардын суранычын кабыл алган. Мен болсо, үммөтүм үчүн Кыямат Күнү шапаат сурап кайрылам” – деп айтканы бар.
Ар бирин буюрса жаттайбыз.

Адам атабыздын дуасы

﷽

Арабчасы (толук аят):

Аяттын ичиндеги дуа:

رَبَّنَا ظَلَمْنَا أَنْفُسَنَا وَإِنْ لَمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ

Аль-Аъраф сүрөсү, 23-аят

Транскрипциясы:

Роббана золамнаа аңфусанаа
Уа иллям тагфир ланаа уа тархамнаа
Ланакуунанна миналь хоосирийн

Котормосу:

О, Роббибиз! Биз өзүбүзгө зулум кылдык. Эгер Сен бизди кечирип, ырайым кылбасаң, анда биз, – албетте, зыянга учуроочулардан болобуз!

---

Нух атабыздын дуасы

﷽

Нух пайгамбардын аты менен Курандын 71-сүрөсү аталган. Анын эли ошол мезгилде 5 бутка сыйынышкан. Алардын аталыштары дагы Куран аяттарында келтирилген: Вадд, Сува, Йагус, Йаук жана Наср. Нух пайгамбардын ысымы Курандын 26 сүрөлөрүндө 46 жолу кайталанат. Ал 50 жашка толгондо пайгамбар болгон. 1000 жыл бою элин Исламга (Аллага гана сыйынууга) чакырган. Нух пайгамбарды “экинчи Адам” деп айтып коюшат. Анткени, топон суудан кийин анын урук-тукумунан элдер тараган. Нух пайгамбар канча жашка чейин жашаганы боюнча көптөгөн пикирлер бар. Алардын кээ бири:

1. 1450
2. 1550
3. 1650

Арабчасы:

Транскрипциясы:

Роббиг-фирлий уа ливаалидайа уа лиман дахала байтий му’минан уа лиль му’ мунинийн уаль му’минаати уа тазидиз-зоолимийна илла табааро.

Котормосу:

Роббим! Мени, ата-энемди, менин үйүмө ыйманы менен киргендерди, момун эркектер менен момун аялдарды кечире көр! Заалымдарга жалаң жок болууну арттыргын!

---

Салих атабыздын дуасы

﷽

Салих пайгамбар Самуд коомуна жөнөтүлгөн. Куранда 9 жерде айтылган. Салих пайгамбар өз элин Аллага сыйынууга чакырат, бирок көпчүлүгү баш тартат. Алардын кээси “пайгамбар экениңди далилдей турган бир укмуштуу керемет көрсөт” деп талап кылгандан кийин алардын талабы менен өздөрү сүрөттөп бергендей таштан ургаачы төө чыгат. Бул Салих пайгамбарга Алла Таала тарабынан берилген муъжиза болгон. Бул кереметти көргөн кээ бир адамдар анын дааватын кабыл алса, кээси баш тартууну улантат.

Анткени, Салих пайгамбар өздөрүнөн эле чыккан адам деп теңсинишпейт. Мындан сырткары адам баласы өлгөндөн кийин кайра тирилет деген маалымат дагы булардын акылына жетпейт. Салих пайгамбардын чакырыгына жооп бербестен, аны жалганчы деп аташып, көп өтпөй чыккынчылык кылып, аларга берилген төөнү да өлтүрүп салышат. Аны менен эле тим болбостон Салих пайгамбарды жана анын үй-бүлөө мүчөлөрүн өлтүрүүгө ашынышат. Бирок Алла алардын айла амалдарын ишке ашырууга жол бербейт. Тескерисинче күнөөкөр коомду жазалоо иретинде аларды жер бетинен жок кылат.

Арабчасы (толук аят):

Аяттын ичиндеги дуа:

رَبِّ انْصُرْنِي بِمَا كَذَّبُونِ

Муминун сүрөсү, 39-аят

Транскрипциясы:

Роббиң сурний бимаа каззабуун!

Котормосу:

Роббим! Мага жардам бер! Алар мени жалганчы кылышты.

---

Ибрахим пайгамбар менен анын уулу Исмаилдин дуасы

﷽

Ибрахим пайгамбар “Халилуллох” – “Алланын эң жакын досу” деген лакап менен таанымал. Ибрахим пайгамбар менен Хажар энебиздин уулу – Исмаил. Арабтардын баары ушул Исмаил пайгамбардан тарады десек туура болот. Исмаил деген ысымдын арапча мааниси “Алланы угуучу ” дегенди түшүндүрөт.

Бул эки улуу адамдын жашоосу өтө кызыктуу окуяларга бай. Алардын бири Алланын үйү Каабаны куруу. Алгачкы мечитти куруп жаткан мезгилде Жаратканга жалбарып, айтылган дуаларды жаттайбыз.

Дуалар өтө узун болгондуктан аларды бир нече бөлүккө бөлөлү.

Арабчасы (толук аят):

Аяттын ичиндеги дуа:

رَبَّنَا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ

Бакара сүрөсү, 127-аят

Транскрипциясы:

Роббана такоббаль миннаа иннака антас-самиуль алийм.

Котормосу:

Оо, Роббибиз! Бизден кабыл кыла көр! Албетте, Сен Угуучу жана Көрүүчүсүң!

Арабчасы:

Транскрипциясы:

Роббана важ’альнаа муслимайни лака уа мин зуррийатина умматан муслиматан лака уа арина манаасикана уа туб алайнаа иннака антат-таввабур рохийм.

Котормосу:

Оо, Роббибиз! Бизди жана урпактарыбыздан да Өзүңө баш ийүүчүлөрдөн кыла көр. Ибадат кылуу жолдорун үйрөт. Биздин тооболорубузду кабыл кыла көр. Албетте, Сен тооболорду Кабыл кылуучу, Мээримдүүсүң!

Арабчасы:

Транскрипциясы:

Роббанаа уаб’ас фийхим расуулан минхум ятлю алейхим ааяятика уа юаллимухумуль китааба уаль хикмата уа юзаккийхим иннака анталь азийзуль хакийм.

Котормосу:

Оо, Роббибиз! Өздөрүнүн арасынан Сенин аяттарыңды окуп, аларга жеткире турган, китепти (Куранды), даанышмандуулукту үйрөткөн жана аларды (ширктен) тазалай турган бир элчи жибер. Албетте, Сен Ызаттуу, Даанышмансың!

---

Лут атабыздын дуасы

﷽

Лут пайгамбар Ибрахим пайгамбардын жээни болгон. Куранда Лут пайгамбардын ысымы 27 жолу кайталанат. Жараткан Алла аны Содом шаарындагы коомго даават кылуу үчүн жөнөткөн. Лут пайгамбардын коому өзгөчө мурда болуп көрбөгөндөй жаман жана жийиркеничтүү күнөө менен алектенишкен. Ал – бачабаздык. Ошол себептен ал: “Дүйнөдө (көптөгөн аялдар туруп) эркектер менен кошулсыңарбы? Мен силердин кылыктарыңардан жийиркенемин”, – деген сөздөрүн айтат.

Алла Таала ал коомду жер бетинен жок кылган.

Арабчасы:

Транскрипциясы:

Робби нажжиний уа ахлий миммаа я’малуун.

Котормосу:

О Роббим! Мени жана менин үй-бүлөмдү булардын кылыктарынан куткар!

---

Юсуф атабыздын дуасы

﷽

Бул пайгамбардын ысымы менен Курандагы толук бир сүрө аталат. Эң кызыктуусу жалгыз ушул Юсуф сүрөсүндө башынан аягына чейин жалаң Юсуф пайгамбардын окуясы баяндалат. Башка сүрөлөрдө андай эмес. Мындан сырткары Ыйык Куранда анын аты 26 жолу кайталанат.

Юсуф пайгамбардын атасынын ысымы Якуб. Анын он эки уулу болгон. Ал Палестинада коюлган. Юсуф пайгамбардын келбети өтө сулуу, өзү акылдуу, түш жоруй алган, адеп-ахлагы жогорку деңгээлде болгон.

Бул пайгамбардын жашоосу өтө окуяларга бай болгондуктан ар түрдүү кино, сериалдар тартылып, роман, повесттер жазылган. Өкүнүчтүүсү, 2008-жылы ирандыктар тараптан тартылган “Юсуф пайгамбар” аттуу сериал аябай популярдуу болуп, көп тилдерге которулуп жайылып кеткен. Негизинен көпчүлүк ушуга окшогон тасмалар чыныгы фактылардан, диний тактыктардан алда канча узакта. Аллахым бизди адаштырбасын!

Арабчасы:

Транскрипциясы:

Робби код аатайтаний миналь мульки уа алламтаний мин та’вийлил ахаадийси фатирос самааваати уаль арди анта валийи фид дунья уаль аахироти таваффаний муслиман уа аль хикний бис соолихийн.

Котормосу:

Оо, Роббим! Сен мага өкүмдарлык бердиң жана түштөрдүн жорулушун үйрөттүң. Асмандар менен жердин Жаратуучусу болгон Сен дүйнөдө да, акыретте да Кожоюнумсуң! Менин жанымды Сага моюн сунган абалда алып, жакшы иштерди жасоочуларга ээрчите көр!

---

Аюб атабыздын дуасы

﷽

Аюб пайгамбардын окуясы Куранда эки сүрөдө эскерилет, бириси Анбия, экинчиси Сод сүрөлөрүндө. Алла ага аябай чоң сыноолорду берген. Алардын ичинде:

• байлык берип, кийин аны кедей кылган;
• ден-соолук берген, соң дарт берди;
• тууган урук бар эле, алар алыстады;
• достору көп болгон, бара бара аны көпчүлүгү таштап кетишти;

Бул сыноолор кээ бир айтымдарга караганда он сегиз жыл бою уланган. Анын досторунун бири ушунча жыл бою сыноого туш болуусу балким чоң күнөө кесепетинен улам уланууда деген пикирин айткан. Бул маалымат пайгамбарга жеткенде, ал: “Алланын аты менен касам ичип айтамын! Силер эмне жөнүндө айтып жатканыңарды билбеймин, бирок мен бир жолу эки адамдын Алланын атын оозуна алып, урушуп жаткандарын көрүп, алардын атынан садака бергем” – деп айтты.

Арабчасы (толук аят):

Аяттын ичиндеги дуа:

أَنِّي مَسَّنِيَ الضُّرُّ وَأَنْتَ أَرْحَمُ الرَّاحِمِينَ

Анбия сүрөсү, 83-аят

Транскрипциясы:

Анний массанияд дурру уа анта архамур рохимийн.

Котормосу:

Мага бир балээ келди, ал эми Сен боорукерлердин боорукерисиң.

Кээ бир тафсир аалымдары ушул аяттан Аюб пайгамбардын өтө сыпайы, адептүү экендиги көрүнүп турат деп айтышкан. Дароо эле Аллага “мага шыпаа берсин, мен ооруп атам, кыйналдым” дебестен ушул сөздү гана айтты. Аллоху Акбар!

Мындан сырткары ага байланыштуу болгон кызыктуу окуялардын бири:
Аюб пайгамбар ооруп жаткан мезгилде аялына ачуусу келип, аны жүз ирет ураарын айтып, Алланын аты менен касам ичет. Аллахым ага шыпаа берип айыкканда аялын уруудан уялып, эмне кылаарын билбей калат. Анткени, ал Алланын ысмы менен касам ичип койгон. Аялы анын ооруганына карабастан ушул узак мөөнөттүн ичинде жанынан чыкпай сабыр кылып, карап жүрдү. Эми эмне кылат? Жараткан Алла – Боорукер Зат 100 арпанын шагын алып, аялын чапканга буйруган. Ошентип пайгамбар касамды аткарды, аялы токмок жебеди, үй-бүлө тынчтыкта жашоону улады. Альхамдулиллах!

---

Шуайб атабыздын дуасы

﷽

Шуайб пайгамбардын аты Куранда он жолу айтылат. Анын коому Мадьян деп аталган. Алар соода-сатыкта алдамчылык, паракорлук, үстөккө берүү сыяктуу иштер менен алектенишкен. Шариатта тыюу салынган “ихтикар” амалын да көп кылышчу. Бул терминдин түшүндүрмөсү мындайча: базардагы бардык буудайларды сатып алып, баасы көтөрүлгөндө кайра сатуу. Мындай кылуу исламда уруксат берилбейт. Буудай эле эмес, башка товарларды да ушул сыяктуу алып-сатуу мүмкүн эмес.

Шуайб пайгамбар көп убакыт бою элин туура жолго чакырган. Алар аны жана аны ээрчигендерди мазактап, ар түрдүү шылтоолор менен кулак салышкан эмес. Акыры Алла Таала жер титирөө аркылуу анын коомун азаптап жок кылды.

Арабчасы (толук аят):

Аяттын ичиндеги дуа:

وَسِعَ رَبُّنَا كُلَّ شَيْءٍ عِلْمًا عَلَى اللَّهِ تَوَكَّلْنَا رَبَّنَا افْتَحْ بَيْنَنَا وَبَيْنَ قَوْمِنَا بِالْحَقِّ وَأَنْتَ خَيْرُ الْفَاتِحِينَ

Аъраф сүрөсү, 89-аят

Транскрипциясы:

Уасиа роббунаа кулла шайин илман алаллоохи, таваккальнаа роббанафтах байнанаа уа байна коуминаа биль хакки уа анта хойруль фаатихийн.

Котормосу:

Анткени, Роббибиздин илими ар нерсени камтып алган. Биз Аллага таяндык! О, Роббибиз! Биз менен (каапыр) коомубуздун арасын акыйкаттык менен ачып (өкүм кылып) кой! Сен эң жакшы өкүм кылуучусуң!

---

Муса атабыздын дуасы

﷽

Ыйык Куранда Муса пайгамбардын аты 136 жолу кайталанат. Ага Алла Таала тарабынан Тоорат китеби берилген, ошол себептүү ал пайгамбар жана элчи болуп эсептелинет. Ал 120 жыл жашаган деп кээ бир маалыматтарда айтылган. Муса пайгамбар Алла Таала менен сүйлөшүү бактысына ээ болгон. Ошол себептүү аны Калиймуллох – Алла менен сүйлөшкөн пайгамбар деп айтышат. Жараткан Алла аны Фараонго жөнөтөт. Аны туура жолго чакыруу жана жамандыктан кайтаруу үчүн сөзгө чечен болушу керек эле. Мына ушул учурда Муса пайгамбар Аллага кайрылып дуа кылат.

Арабчасы (толук аят):

Аяттын ичиндеги дуа:

رَبِّ اشْرَحْ لِي صَدْرِي * وَيَسِّرْ لِي أَمْرِي * وَاحْلُلْ عُقْدَةً مِنْ لِسَانِي * يَفْقَهُوا قَوْلِي

Тоо хаа сүрөсү, 25-28-аяттар

Транскрипциясы:

Роббиш-рох лий содрий * уа яссир лий амрий * уах-лиль укдата мин лисаний * яфкоху коулий.

Котормосу:

Оо, Роббим! Менин көкүрөгүмдү кенен кыл! Менин иштеримди жеңил кыл! Тилимдеги түйүндү чечип кой! Адамдар (сөзүмдү) түшүнчүдөй болсун!

---

Сулейман пайгамбардын дуасы

﷽

Сулейман пайгамбардын атасы Дауд а.с. болгон. Ал Газа шаарында туулуп, Иерусалимде каза болуп, Кудста коюлган. Сулейман пайгамбар ааламдагы бардык макулуктарды башкарып, жан-жаныбарлардын тилин түшүнгөн. Мындан сырткары Жараткан Алла аны аябай көп мал-байлыкка ээ кылган. Он эки жашка толгондо падышалык бийлиги башталып, кырк жыл уланган. Анын учурунда көптөгөн шаарлар, көпүрөлөр, хан-сарайлар курулган. Аларды курганга жиндерди иштеткен. Ошону менен биргеликте ал өтө такыба, даанышман, жароокер инсан эле. Анын өлүмү да өзгөчө окуя менен коштолот. Сулейман пайгамбар жаңы курулуп жаткан имаратты контролдоо иретинде таягына таянып турган кезде, өлүм периштеси келип жанын алып кетет. Анын денеси жыгылбастан узакка чейин турат. Иштеп жаткан жиндер анын каза болгонун сезбей, көпкө чейин иштерин улантышат. Качан гана таяктын түбүн курт жеп, денеси жерге кулаганда ал эбак жан бергенин түшүнүшөт. Мындан улам жиндер гаибти билбейт деген далил келип чыгат.

Арабчасы (толук аят):

Аяттын ичиндеги дуа:

رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحًا تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ

Намль сүрөсү, 19 аят

Транскрипциясы:

Робби аузи’ний ан ашкуро ниъматакал-латий анъамта алайа уа ала уаалидайа уа ан аъмала соолихан тарзооху уа адхилний бирохматика фий ибадикас соолихийн.

Котормосу:

О, Роббим! Мага жана ата-энеме берген нээматтарыңа шүгүр кылууга жана Өзүң ыраазы боло турган иштерди аткарууга мени жөндөмдүү кыл жана салих пенделериңдин катарында Өз ырайымыңдын астына киргиз!

---

Закария пайгамбардын дуасы

﷽

Толук аты – Закария ибн Бархия ибн Муслим ибн Садук. Кээ бир маалыматтар боюнча ал 125 жашка чейин жашаган. Ыйык Куранда Закария пайгамбардын ысымы жети (7) жолу айтылган. Иерусалимдеги аль-Кудс мечитин куруу боюнча дагы көп тарыхый маалыматтар бар. Андан сырткары көзү да ошол жерде жумулган. IX кылымда мусулмандар Иерусалим шаарын “Ыйык шаар” (аль-Кудс) деп аташат эле. Закария пайгамбар жыгач уста болгон.

Ал мезгилде Марям энебиздин апасы ага кызын табыштап, анын көзөмөлүнө калтырат. Ошондо Марямдын ибадаткөйүн көрүп, Алла дуаларды сөзсүз кабыл кылаарын түшүнүп, ал дагы жалбарып, ыймандуу перзент сурана баштайт. Кантсе да, өзү да, аялы да улгайып калышкан. Ошондой болсо да, Алланын кудурети менен уулду болушту. Атын Яхья коюшту.

Баарыбызга белгилүү болгондой эле, Марям энебиз Иса пайгамбарды төрөгөндө элдин баары аны никесиз балалуу болгону үчүн азаптайбыз дегенде, Алланын кудурети менен Иса ымыркай абалда, энесин актап бешиктен сүйлөйт. Айласы кеткен адамдар ачууларын Закариядан чыгарышат. Марямга жакындык кылды деген жалаа менен өлтүрүп коюшат.

Закария пайгамбардын перзенттүү болууну каалап, Аллага жалбарып кайрылган дуасы:

Арабчасы (толук аят):

Аяттын ичиндеги дуа:

رَبِّ هَبْ لِي مِن لَّدُنكَ ذُرِّيَّةً طَيِّبَةً إِنَّكَ سَمِيعُ الدُّعَاءِ

Аль-Имран сүрөсү, 38-аят

Транскрипциясы:

Робби хаб-лий мил-ладуңка зурриятан тойибатан иннака самиъуд-дуа

Котормосу:

О Роббим! Мага да Өзүңдүн даргөйүңдөн пакиза бир урпак бере көр! Албетте, Сен дубаны Угуучусуң!

---

Иса пайгамбардын дуасы

﷽

Иса пайгамбардын толук аты – Иса ибн Марям. Ага Инжил китеби берилген. Ыйык Куранда Иса пайгамбардын ысымы 25 жолу айтылат. Ал христиандар айткандай Кудайдын уулу эмес. Иса Алла Тааланын кулу, элчиси жана пайгамбары. Кээ бир риваяттарга таянсак, Иса отуз жашка чыккандан баштап, даават ишин баштаган. Ал аябаган таң калычтуу кереметтерди (мужизаларды) көрсөткөн. Мисалы: өлгөн адамды тирилтүү, чоподон жасалган чымчыктарды жандандыруу, көзү азиздерге көрүү мүмкүнчүлүгүн берүү, айыкпас дартка кабылган инсандарды айыктыруу жана башка толтура мужизалар.

Арабчасы (толук аят):

Аяттын ичиндеги дуа:

رَبَّنَا أَنْزِلْ عَلَيْنَا مَائِدَةً مِنَ السَّمَاءِ تَكُونُ لَنَا عِيدًا لِأَوَّلِنَا وَآخِرِنَا وَآيَةً مِنْكَ وَارْزُقْنَا وَأَنْتَ خَيْرُ الرَّازِقِينَ

Маида сүрөсү, 114-аят

Транскрипциясы:

Роббана аңзил алайнаа мааидатан минас-самааи такууну ланаа ъийдан ли’аввалинаа уа аахиринаа уа ааятан минка уарзукнаа уа аңта хойрур роозикийна.

Котормосу:

Оо Роббибиз! Бизге асмандан дасторкон түшүр! Оболку жана кийинкилерибизге майрам жана Сенден бир белги болсун. Бизге ырыскы бер. Сен ырыскы берүүчүлөрдүн эң мыктысысың!

---

Юнус пайгамбардын дуасы

﷽

Юнус пайгамбар Ниневия деген шаарда төрөлүп өскөн. Өз коомунун арасында чынчыл, адептүү жана жардамга тез келүү сыпаты менен айырмаланып турат эле. Бирок Ислам тарыхында ал “Зун Нуун” же “Сохибуль Хут” деген лакабка аны кит жутуп алгандан баштап ээ болгон. Кээ бир маалыматтар боюнча ал 30 жаштан пайгамбарчылык милдетин алган. Юнус пайгамбар 33 жыл бою элине даават айткан.

Көптөгөн окуялардын себебинен Юнус пайгамбарды кит жутуп алат. Анын ичинде отурган пайгамбар Аллага жалбарып, дуа кылганда, ошол апааттан кутулган.

Арабчасы (толук аят):

Аяттын ичиндеги дуа:

لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ

Анбия сүрөсү, 87-аят

Транскрипциясы:

Лаа илааха илла анта Субхаанака инний кунту миназ-зоолимийн.

Котормосу:

Өзүңдөн башка (сыйынууга татыктуу Зат) жок. Сен Аруу-Тазасың! Акыйкатта, мен заалымдардан болдум!

---