Журок жыргайт Куран аят окулганда,
Тыңшап бүтпөйм Куран үнү жаңырганда.
Угайынчы жүрөк менен Куранды мен,
Шүгүр айтып өмүр бою Жаратканга.
Алла энеден дагы чексиз Мээримдүү! Эмнеге дейсизби? Эне өз баласынын ката кетирип бир жерин оорутуп албоосун каалагандай эле, Алла да өз пендесинин чоң күнөөлөрдү кетирип, шайтандын чырмалган торуна чалынып, тозокко түшүүсүн каалабайт. Ошондуктан да мээрим, ырайым катары өзү жараткан пенделерине Куран деген неематты түшүргөн. Себеби дал ушул Алланын сөзү болгон Ыйык Курани Каримде адамзат үчүн улуу пайда жана туура жол бар. Бул жолду карманбай туруп адамзат Бейишке кире албайт.
Бул сырдуу китепте ооруга шыпа аяттардан тартып, жашооңо пайда берип, муктаждыкты бүтүрүүчү дубалар бар. Ал эми акыйкат издегендер үчүн туура жол көргөзүлгөн. Адамзатына пайда жана зыян бере турган нерселер баяндалган. Айтор, азыркы учурдагы жетишкен илим таң калып бүтпөгөн ачылыштар дал ушул Куранда небак эле айтылган. Андан сырткары адамдын акылы жетпей турган Аллага таандык аяттар жайгашкан.
Окусаң дартыңа даба, уксаң жан дүйнөңдү тынчтандырган улуу Жараткандын сөзү камтылган.
Бул китепти окуган инсандын жүзү нурлуу, ал эми сөзү өтүмдүү болоору айдан ачык кеп. Андыктан ар бир үйдө Куран үнү жаңырсын! Оо “апа “деген статуска ээ болгон инсандар ! Куранды тафсирлеген, аны жаттаган хафиз балдарды тарбиялап чыгарууга, болгон күчүбүздү жумшайлы. Себеби, чын ыкластан Куран жаттаган пендесин Алла эки дүйнө кор кылып таштабайт . Андыктан өз жашообузга өзүбүз жоопкерчилик алып, бул кыска өмүрдө Куранды түп нускасында (араб тилинде) окууну үйрөнмөйүн жана балдарга үйрөтмөйүн бул дүйнөдөн өтпөөнү Алла насип эткен болсун
Макаланы жазган: Айтикул кызы Апал