Жүрөктөрдүн сүйүктүүсү, көздөрдүн нуру, адамзатынын үлгүсү, бүткүл ааламга мээрим болуп жөнөтүлгөн азирети Мухаммад Мустафага (саллаллооху алайхи васаллам) сиздин үммөтүңүз Толгонайдын сизге болгон сагынычтуу саламы.
Оо менин сүйүктүү Пайгамбарым! Оо Алланын элчиси! Сиздин улуу хадистериңизден: “Мени көрүп ыйман келтиргенге бир жакшылык, ал эми мени көрбөй ыйман келтиргенге жети жакшылык болсун”, – деген сөзүңүздөн ушул жерде туруп Алланын жалгыздыгына, Андан башка сыйынууга татыктуу илах жок жана сиз Алланын кулу жана элчиси экениңизге күбөлүк берем.
Оо менин сүйүктүү Пайгамбарым! Сиз сахабаларыңыз менен Бакый мүрзөсүнөн келе жатып: “Мен туугандарымды сагындым”, – деген сөзүңүздү окуп, арадан он төрт кылым өтсө да, сизге болгон сагыныч, кусалык катымды ушул ак кагаз бетине түшүрүп жазып жатамын.
Оо Алланын элчиси! Эгерде инсандардын ичинен эң бийик даражадагы кулк-мүнөз, адеп-ахлак адам келбетиндеги сүрөт болуп келсе, сиздин адеп-ахлагыңыз алдында таазим кылмак. Анткени, Алла Таала сизди эң улуу ахлак ээси кылды, сиздин адебиңиз эң жогорку деңгээлде эле.
Оо, менин сүйүктүү Пайгамбарым! Оо, ааламдардын мырзасы болгон Алланын элчиси! Биз сизди көрбөй туруп сүйдүк. Сиздин жамалыңызды көрүүгө жана сиздин мубарак үнүңүздү угууга ашыкпыз. Сизди сагындык жана бейиште сизге кошуна болууга, сиздин куттуу колуңуздан Кавсар көлүнүн суусун ичүүгө, сиздин нурлуу жүзүңүздү көрүү жана жагымдуу үнүңүздү угуу мен үчүн эбегейсиз зор бакы
Йа Расуулуллах! Сизди түшүмдө көрүүнү каалаймын. Мен сизди көрө албадым, бирок бизге калтырган илим мурасыныз баа жеткис байлык.
Йа Расуулуллах! Сиз биздин жаныбызда болбосоңуз да жүрөктөрдүн түпкүрүндө жашайсыз. Менин сизге болгон сүйүүм ушунчалык улуу, аны сөз менен жеткире албаймын. Сиз жашаган доордо болууну өтө каалайт элем, бирок мен кеч келдим. Эгер келүү инсандын каалоосунда болгондо, мен сиз жашаган доордо келээр элем. Сизге болгон кабарым үммөттүн бөлүнүп жарылуусу мени кайгыга салат. “Үммөтүм” дедиңиз эле, бирок учурдагы үммөттүн азыркы абалын көрсөңүз биз сизден уялып кандай абалда болот элек? Сиз үммөт үчүн күнү-түнү тыным таппай мээнет кылдыңыз эле, үммөтүм деп түнү буттарыңыз шишигенче намаз окудуңуз эле, үммөтүм деп чачтарыңыз агарды, мээрим көздөрүңүз жашка толду. Бирок үммөт азыркы учурда бытырап чачырап алсырады. Үммөт ортосунда ынтымак жоголду, үммөт биригүүнүн ордуна чачырап кор болууда.
Оо Алланын элчиси! Акыретте сиздин жүзүңүздү кантип караар экенбиз? Аялдарда уяттуулук жоголду, эркектерде жоопкерчилик алсырады. Сиздин үммөтүңүз жүрөктөрүн дүйнөгө болгон сүйүү менен толтурду. Аларда динине болгон кайдыгерлик, бей капарчылык, бир тууганга болгон мамилеси алсырады. Үммөтүңүз бейишке кызыгуу, тозоктон коркуу деген сезимдерди жоготту. Дүйнөгө баш оту менен кириптер болду. Менин сизге кабарым сиз динди жеткирүүдө, даават кылган учурда башыңыздан көптөгөн кайгы азап өткөрдүнүз эле, бирок үммөт даават мээнетин таштагандыктан көптөгөн коркунуч ооруларга кабылып, ниет жана ишенимге ширк оорусу кирип келди. Сиз жана сахабаларыңыз Алланын ыраазычылыгын издесеңиз, үммөт инсандардын ыраазычылыгын издеп калды.
Оо Расуулуллах! Менин сизге кабарым! Бүгүнкү күндө бүткүл дүйнөдөгү адамдар тынчтык жана бейпилдик издеп жатышат. Бирок жүрөктөрдүн тынчтыгы бир гана Алланы эстөөдө экенин унутту. Мени бир нерсе ойлондурат. Мен сахабалар жана жакшылар астында киммин? Мен сизге Саур үңкүрдө жолдош болгон Абу Бакр (р.а) боло албадым; сизди дайым колдогон Умар Ибн Аль-Хаттаб (р.а) боло албадым; дайым жаныңызда кызмат кылган Анас Ибн Малик (р.а) боло албадым; сизди коргогон Али Ибн Абу Толиб (р.а) боло албадым; кооз азанчы Билал Ибн Раббах (р.а) боло албадым; эң биринчи динди кабыл кылып, дин мээнетинде сизди колдоп, сизге жардам берген Хадича (р.а) энебиз боло албадым. Сиздин жүзүңүздү акыретте көрө аламбы, Йаа Расуулуллах?
Оо менин сүйүктүү Пайгамбарым! Сизге менин сагынычтуу саламым болсун. Сиздин куттуу хадисинизде “Бул дүйнөдө кимди сүйсөң акыретте ошол менен бирге болосуң”, – деген сөзүңүздөн, күнөөлөрүмө карабай Роббимден үмүт кылып калам. Сизди сагындым, сизге болгон сүйүү сезимим улуу, сизди көрүүгө, сиздин үнүңүздү угууга, мубарак көздөрүңүздү көрүүгө ашыкмын. Сизге айта турчу бир гана сөзүм: сизди сагындым Оо Алланын элчиси. Сизге айта барчу сөзүм сизге болгон сагынычым, сизге болгон чексиз сүйүүм жана үммөттүңүздүн динге болгон алсыздыгы.
Макаланы жазган: