Бүгүн дагы таң атты намазсыз,
Өлүм келет айттырбай кабарсыз.
Чачтан ичке, курч болгон кылычтан,
Сыроотуңдан кантип өтөм амалсыз…
Адамга өмүр бир гана жолу берилээрин айтпасак да билебиз. Кептин баары берилген өмүрдү туура колдонууда.
Бири Алла берген убакытты туура, ибадатка максаттуу колдонсо, кээси өмүрүн маанисиз бул дүйнөнүн кызыкчылыгы менен алектенип өткөрөт. Жараткан ар бир инсанга тандоо бергенин баса белгилеп айткым келип турат. Мейли, кааласаң намаз окубай деле, орозо тутпай, садака бербей, бирөөгө жардам колуңду сунбай деле өтсөң болот. Бирок, бир нерсени эсиңден чыгарба! Жасаган тандооңо сөзсүз жооп бересиң! Жараткан буйруган нерселерди четке кагып, Ага моюн сунбаганыбыз үчүн акыретте суралабыз.
Чындыгында, көп нерсеге ой жүгүртсөк акыйкатты тапмакпыз. Ден-соолугубузду эле карап көрөлүчү: бир органыбыз кокус иштен чыга турган болсо, канча акчаларды коротуп дароо даарыланганы шашабыз. Эх, Алла Таала ошол ар бир мүчөбүз үчүн акы албастан ар бир органыбызды мөөнөт, секунд сайын иштетип жатат.
Алла ушунчалык мээримдүү Зат, Ал ар бир пендесинин Жаратканын таап, Ага кулчулук кылып, Бейишке кирип кетүүсүн каалайт. Ошондуктан ар кайсы жол менен пендесин өзүнө чакырат. Бирин сый, башкасын ый менен алып келгенин канчалаган пенделерине ооруу, кырсыкка кабылтуу менен алып келип жатканын көрүп эле жүрөбүз.
Ойлон менин сүйүктүү боордошум! Балким, сага да ыйманыңды бекемдөөгө убакыт келип жеткендир. Алла ый менен өзүнө алып келдиргенче СЫЙ менен убагында Жаратканыбызды таап калалы
